Birna Pétursdóttir leikkona og handritshöfundur hlaut Grímuna sem leikkona ársins í aukahlutverki fyrir leik sinn í söngleiknum Benedikt Búálfur, en Birna hefur leikið mikið hjá Leikfélagi Akureyrar og þar fyrir utan komið að handritsskrifum og framleiðslu sýninga sem hafa hlotið mikið lof og athygli. Árið 2018 hlaut leikhópur hennar, Umskiptingar, tilnefningu sem Sproti Ársins eftir að fyrsta verk þeirra Framhjá rauða húsinu og niður stigann var sýnt á Akureyri og í Reykjavík. Þá hlutu Umskiptingar aftur tilnefningu til Grímunnar ári síðar fyrir Barnasýningu ársins fyrir annað Galdragáttina, sem Birna skrifaði ásamt hinum Umskiptingunum. Nú er í sýningu verkið Fullorðin en verkið er frumsamið af Birnu, Vilhjálmi Bragasyni og Árna Beinteini. Verkið hefur notið mikilla vinsælda og hlotið mikið lof og verður tekið til sýninga í Þjóðleikhúsinu í mars 2022. Fyrir utan leikhúsið hefur Birna einnig unnið töluvert fyrir sjónvarp en hún var umsjónarmaður Landans 2017-2018. Þá átti Birna hugmynd að og sá um framleiðslu og dagskrárgerð að heimildaþáttaseríunni Í góðri trú sem voru sýndir á RÚV haustið 2020.