Bjartey stundaði dansnám í Klassíska Listdansskólanum frá 4 ára aldri. Eftir útskrift þaðan fékk hún hlutverk í Þjóðleikhúsinu í sýningunni Fjarskaland og dansaði með ungmennadansflokknum FWD Youth Company. Þaðan lá leið hennar á samtímadansbraut Listaháskóla Íslands. Eftir útskrift þaðan hefur hún unnið með danska dansleikhúsflokknum The Nordic Beasts sem er leiddur af danshöfundinum Noora Hannula. Þar hefur hún dansað og leikið í tveimur uppfærslum í Danmörku árin 2022 og 2023. Bjartey dansaði í þungarokksballettinum Satanvatnið eftir Selmu Reynisdóttur sem var frumsýnt í Tjarnarbíó í desember 2023. Frá byrjun árs 2024 hefur Bjartey dansað í verkefnum með Íslenska Dansflokknum, m.a. Í Rómeó og Júlíu eftir Ernu Ómarsdóttur og Höllu Ólafsdóttur og While in Battle I´m free, never free to rest eftir Hooman Sharifi.

Bjartey er virk í eigin sköpun. Hún er meðlimur í gjörningapönksveitinni The Boob Sweat Gang sem hefur spilað á helstu skemmti- og tónleikastöðum borgarinnar og á hátíðum víðsvegar um landið. Hún er einnig partur af dúettinum VENUS ásamt Önnu Guðrúnu Tómasdóttur. VENUS er verk í vinnslu sem Bjartey og Anna semja og flytja. Þær hafa sýnt fyrstu útgáfur verksins á Reykjavík Dance Festival og í Tjarnarbíó. Svo er það Óþekkt Tríó sem er dansverk sem hún tekur þátt í að semja og flytja ásamt Birnu Karlsdóttur og Sóleyju Ólafsdóttur, þær hafa sýnt á Safnanótt í Hafnarhúsinu og á Reykjavík Dance Festival. Síðastliðin tvö ár hefur Bjartey séð um sviðshreyfingar í uppfærslum óperuhópsins Óðs í Þjóðleikhúskjallaranum og Sjálfstæðissalnum.